Preparing to Fly 2: Poem by Sheena Blackhall

Amangst the Trees Three Birds War Steerin

Amangst the trees three birds war steerin

Deil the feather tae their name

Three wee fledglins raxxin, skreichin:

Cheep cheep, ma, wir wymes are teem!

Gie's a wirm, a hornygollach,

A sappy slug, a forkietail,

An emerteen, a furry moch,

The squashed intimmers o a snail.

Inbye a hoose, three bairns war steerin

Bed-time, bit wi nae remeid,

Three wee bairnies, tchyauvin, skreichin,

Greetin fur a buik tae read.

Stories steek their een at nicht

Dragons, feys, in widlans deep

Fin the meen shines in the derkness

Stories pave the wye tae sleep.

© Sheena Blackhall, 2013